040618

近排唔多得閒，今日先發現，睇開既網頁留言版，無啦啦有人鬧黎鬧去。又或者係將唔多關事既人拉埋落水。真係無聊。簡直可以好似睇戲咁睇，我唔覺得自己刻薄，但係件事的而且確好有娛樂性囉。

其實呢d根本就係閒事，成日都會有，通常都係無聊批評，話你呢話你路，話你乜乜物物，講埋你屋企條狗生滋都得，咁人地既口同手又唔係生0係你度，都冇計。

我都深知香港有言論自由，你講乜都得，呢度係一個公平既社會，其實個個都可以好似你一樣既，人人都可以講，但係我想話，唔好意思，個人有修養，無 乜必要同無謂人拗埋d無謂野(修養呢樣野，有D人就算讀好多書都未必識囉。)，所以我都希望朋友仔們一個兩個唔好因為咁而唔開心。

Internet入面，你唔識我，我唔識你，你求其留個名係Susan, Mary, David, Richard都好，留乜都冇人阻止到，最多之後個網主睇完覺得唔開心就刪走佢，咁係乜問題先，乜野身份都好，都係人咋，奉旨比你鬧麼？

就好似咁，唔知乜人點解要咁討厭你，時不時0係你門口放舊屎，你要返工起身開門，未見到已經聞到臭，見到咁點呀？咪執走佢囉，搬屋呀唔通？

人地感情投射得咁緊要，特登放舊屎你門口，咁有誠意，你搬屋都係咁話啦。係咪先？

要拋書包我唔識，但係起碼我知道要尊重人尊重自己，咁簡單既事都做唔到，真係比人評擊既我都覺得係抵死囉。為乜先，咁唔鐘意咪唔好睇囉，唔通有人用槍指住你個頭逼你？成個世界多人，唔係人人都要好似你咁諗呀？你又唔鐘意又要睇又要鬧，都真係幾得意個喎！

真係好無聊。