050125

真實的有多真實，他是你，她是你，牠是你，你是他，你是她，你是牠，你什麼都是，你什麼都不是，你早已消失湮遠。

嘩！嘩！嘩！我返黎喇！

相信，一直有黎呢度探開我既朋友都知道，個網頁已經冇運作三四個月喇！究竟乜事呢？

好無奈哩！交待下先，本人對感情事一向都好唔理智，仲要係好沉迷果隻。三年前到同一個相親相愛過兩年既男朋友分開，一次既失戀就令本人失足三年，呢三年入面同佢都仲有斷斷續續既來往。零四年既十月，我仲同呢個前男友，wow，好勁！發生左極度十級爆炸既不愉快事件，自不然亂諗野，寫過另一個地方，但係原來唔知點寫落去，又冇左咁。真正灰到爆！基本上我既朋友都略知一二囉。

案情延續至上個星期，有新發展，前男友終於結束佢所講既「浪子生涯」shit！佢拍拖喇！呢種咁敏感既事，本人知道梗係極度震憾啦！第一個反應就係扮冇野冷靜下自己，都唔知應該比乜反應，之後呢當然就係喊喊喊同埋喊啦。其實暗地裡我都知我係等呢一日。唔開心我一早預左。 諗黎諗去，淨係知道，人地拍拖喇即是宣佈你唔好再鐘意人喇，你已經消失左家喇，就算你乜都唔做咁都係錯家！成個人即刻想爆炸！！！呢幾年咁唔開心都過左，到今日又可以點呢？我又的而且確知道呢個只係我個人問題，佢拍拖與否其實已經一早唔關我事。 嗯。短短幾晚，晚晚失眠，訓得著小小時間就發惡夢，終於病左，攤起床上面想企都企唔穩，又嘔又性，原來醫生話感親，耳水不平衡，暈就梗，食下止暈止嘔藥就 會冇事，哦。喊下咁啦，其實都冇乜意思，想釋放下情緒囉！朋友一二，知道既就黎關心我，睇下我點，唔知道既同事話我額頭寫左失戀兩個大字，乜原來咁覺既 咩？

媽咪，我暈喇！唔好以為我癲左或什麼，我冇啊！不過我一路以為覺得值得就可以家嘛，咁值唔值得係我自己覺得家嘛，就算除左我以外冇人覺得都係得家嘛！我愛既佢其實都已經唔存在其實佢變左，我都變左，我明家真係。我係知衰家。我諗唔通又諗唔明，依家你問我仲愛唔愛佢？我會答你「愛家，不過算啦！」<- 我都知係離晒譜！

我唔想愛我既朋友要窺探我狀況，之前我真係特登收埋自己同埋比好多野自己做，返多份part-time，原來真係好累家喎，逃避現實丫嘛，係咁家啦，仲有我呢想作曲啊，所以咪去學電子琴囉，正！就係咁，由Monday ~ Friday 冇一日係可以有時間亂諗野喇！我都覺得自己變態做左超人咁呀！

其實我自己都掛住呢度家，寫左網頁都有四~五年喇，不過有兩年既記事比自己delete左，依家留低只有咁多，我有時都想睇返果兩年既事，不過網上已經冇存檔咯，好彩以前冇咁懶都仲要寫下日記咁，但係carriegua呢個地方係留低左我好多好多既感覺，實開心既事都唔少家。其實我自己都唔知原來我有D朋友仔，一路暗啞底黎呢度關心我既近況，跟手就知我冇寫到有d擔心加奇怪咁囉。仲有啊，呢兩三年都做錯唔少事，有公開既，有秘密既，依家我真係好想正視自己，提下自己，唔好再犯咁多錯，等第日都有得睇返嘛！我自己都覺得好流汗啊！-__-"

我 唔敢講，咁樣之後我一定會開心返，或者唔會再為呢個人傷心(實在我開過太多空頭支票比自己)，但係我真係，真係會盡量做好自己。而愛我既你地，知道嗎？一 直得到你地安慰既我如果冇左你地既支持，我真係會不堪設想，(你地有眼睇啦，依家其實都ok糟糕家喇！)，我真係好多謝好多謝你地一直既照顧家！朋友，你 地放心啦，我有事會講家喇，唔會係咁收埋家喇！